Azərbaycan Gənclərinin Avropaya İnteqrasiyası Təşkilatı (AGAT) iyunun 20-də Fransanın paytaxtı Parisin "Ecole Militaire" sarayında "Azərbaycanın Avropaya inteqrasiyası: problemlər və perspektivlər" mövzusunda konfrans keçirəcəkdir.
AGAT-ın mətbuat xidmətindən AzərTAc-a bildirmişlər ki, Azərbaycan Respublikasının Prezidenti yanında QHT-lərə Dövlət Dəstəyi Şurasının, "Gazelli" mağazalar şəbəkəsinin, "Azəriqazbank" Açıq Səhmdar Cəmiyyətinin dəstəyi ilə təşkil olunacaq tədbirdə ölkəmizin əldə etdiyi nailiyyətlərlə yanaşı, Qarabağla bağlı həqiqətlərin Fransa ictimaiyyətinə çatdırılması nəzərdə tutulmuşdur. Tədbirin ekspertləri Bakı Dövlət Universitetinin müəllimi, hüquqşünas Fazil Zeynalov, Azərbaycan Respublikasının Prezidenti yanında Strateji Araşdırmalar Mərkəzinin nümayəndəsi Gülmira Rzayeva olacaqlar.