Bakı buxtası üzərindən avtomobil körpüsünün inşası layihəsi artıq hazırdır.
Bu sözləri Nəqliyyat Nazirliyinin şöbə müdiri Sədrəddin Məmmədov demişdir.
S.Məmmədov bildirmişdir ki, artıq layihənin texniki-iqtisadi əsaslandırılması işləri başa çatmışdır. Layihəyə görə, uzunluğu 17 kilometr olacaq körpünün tikintisi təqribən iki milyard dollara başa gələcəkdir. Bu, təkcə nəqliyyat deyil, həm də turizm layihəsi olacaqdır. Belə ki, burada şəhərin abadlaşdırılması elementləri də əksini tapacaqdır.
İlkin plana görə, layihənin həyata keçirilməsi qərara alınarsa, bunun üçün beynəlxalq konsorsium yaradılacaqdır. Körpünün detallı layihəsi hazırlanıb təsdiq olunandan sonra konsorsium onun tikintisini həyata keçirəcəkdir. Tikinti başa çatandan sonra konsorsium onun idarəetməsi ilə məşğul olacaqdır.
Körpünün inşası nəqliyyatın hərəkətini dəfələrlə asanlaşdıraraq, həm şəhərdəki tıxac probleminin həllinə, həm də ekoloji vəziyyətə müsbət təsir edəcəkdir. Onun istifadəyə verilməsi ilə avtomobillə Zığ dairəsindən Lökbatandakı ticarət mərkəzlərinə getmək üçün cəmi 6 dəqiqə vaxt lazım olacaqdır.

AzərTAc