Ölkənin şimal-qərb bölgəsində baş vermiş zəlzələnin nəticələrinin aradan qaldırılması istiqamətində Fövqəladə Hallar Nazirliyi (FHN) və aidiyyəti dövlət qurumları tərəfindən kompleks tədbirlər davam etdirilir.
Fəlakət bölgəsində qəzalı vəziyyətə düşmüş fərdi evlərin və məktəb binalarının çoxu artıq sökülmüş, ərazi təmizlənərək tikintiyə hazır vəziyyətə gətirilmişdir.
Yeraltı təkanlar nəticəsində evləri qəzalı vəziyyətə düşmüş ailələr üçün yeni evlərin tikintisinə başlanmışdır. Hazırda evlərin özülü qazılır, betonlama işləri görülür. Xüsusi layihələr əsasında tikiləcək bu evlər iki, üç, dörd və beş otaqlı olmaqla, güclü zəlzələlərə davamlı olacaqdır. Ərazidə 12 podratçı tikinti təşkilatı fəaliyyət göstərir. Evlərin tikintisi üçün lazım olan inşaat materiallarının gətirilməsi davam edir.
Tezliklə məktəb binalarının da tikintisinə başlanacaqdır.

AzərTAc