Türkmənistanın ölkəmizdəki səfiri Toyli Komekov iyunun 18-də Azərbaycanın Xarici İşlər Nazirliyinə (XİN) dəvət olunmuşdur. 
XİN-in mətbuat xidmətindən verilən məlumata görə, xarici işlər nazirinin müavini Xələf Xələfov ilə keçirilmiş görüşdə bildirilmişdir ki, 2008-ci ildə iki ölkə arasında əldə olunmuş razılaşmaya əsasən, tərəflər Azərbaycan və Türkmənistan sektorlarının dibinin kəsişdiyi sahələrdə Xəzər dənizinin dibinin bölgüsü ilə bağlı məsələlər razılaşdırılmayanadək kəşfiyyat və hasilatla bağlı heç bir fəaliyyət həyata keçirməyəcəklər. Bu razılaşma pozularaq Azərbaycan və Türkmənistan sektorlarının kəsişməsində yerləşən "Kəpəz" yatağında Türkmənistan tərəfindən seysmik işlərin aparılmasına cəhd göstərilir.
Bununla əlaqədar Türkmənistan tərəfinə qəti etiraz bildirilmiş və qeyd olunmuşdur ki, Türkmənistanın hüquqa zidd fəaliyyəti qəbuledilməzdir. Azərbaycan tərəfi Xəzər dənizində suveren hüquqlarının müdafiəsi ilə bağlı müvafiq tədbirlərin görülməsi hüququnu özündə saxlayır.

AzərTAc