Azərbaycan Respublikası Baş Prokurorluğunun kollektivi 15 İyun - Milli Qurtuluş Günü münasibətilə Bərdə rayonunda məskunlaşmış məcburi köçkün ailələri ilə görüşmüşdür. Prokurorluq işçiləri 704 ailəyə ərzaq yardımı paylamışlar. 
Baş Prokurorluğun məsul işçiləri və 24 rayon prokurorluğunun əməkdaşları Bərdə şəhərindəki Meşəçilik İnstitutu ərazisində məskunlaşmış məcburi köçkünlərin problemləri ilə maraqlanmışlar.
Görüşdə Baş Prokurorluğun idarə rəisi Kamal Qılıcov Dağlıq Qarabağ probleminin sülh yolu ilə həlli, habelə qaçqın və məcburi köçkünlərin yaşayış şəraitinin yaxşılaşdırılması istiqamətində dövlətimizin başçısının apardığı siyasət barədə məlumat vermişdir. Bildirilmişdir ki, Prezident İlham Əliyevin rəhbərliyi altında həyata keçirilən məqsədyönlü siyasət Ermənistan-Azərbaycan, Dağlıq Qarabağ münaqişəsinin xalqımızın mənafeyinə uyğun həll olunması, işğal altındakı torpaqlarımızın azad edilməsi ilə nəticələnəcəkdir.
Göstərilən diqqət və qayğıya görə minnətdarlıqlarını bildirən məcburi köçkünlər Prezident İlham Əliyevin işğal altında olan torpaqlarımızın azad edilməsi, ölkəmizin sosial-iqtisadi inkişafının sürətləndirilməsi istiqamətindəki fəaliyyətini dəstəklədiklərini bildirmişlər.

AzərTAc