İyunun 14-də əmək və əhalinin sosial müdafiəsi naziri Füzuli Ələkbərov nazirliyin 142 - qaynar xətti vasitəsilə müraciət edən vətəndaşlar, həmçinin nazirlikdə yaradılmış videokonfrans sistemi vasitəsilə müxtəlif bölgələrin sakinləri ilə görüşmüşdür. 
Nazirliyin ictimaiyyətlə əlaqələr şöbəsindən bildirmişlər ki, görüşdə müraciətlər araşdırılarkən ayrı-ayrı vətəndaşların ünvanlı sosial yardımların təyinatı, əlillik dərəcələrinin verilməsi və s. məsələlərlə bağlı qanunvericilik barədə məlumatsız olduqları müəyyən edilmiş və onlara hüquqi izahatlar verilmişdir. Əsassız şikayət ərizələri ilə yanaşı, haqlı narazılıqların olduğu da məlum olmuşdur.
F.Ələkbərov vətəndaşların haqlı narazılığına səbəb olan halların ciddi şəkildə araşdırılması, vəzifəsində nöqsanlara yol vermiş əməkdaşlar barədə tədbirlər görülməsi və s. barədə tapşırıqlar vermişdir.
Görüşdə yoxsulluq vəziyyətindən çıxmaq üçün potensial imkanlara malik olan ailələr də müəyyən edilmiş və onların gələcəkdə fəal sosial müdafiə tədbirlərinə, eləcə də cari ildə işə salınacaq sosial kreditləşmə proqramına cəlb edilmələri qərara alınmışdır.Görüşdə F.Ələkbərov 15 iyun - Milli Qurtuluş Gününün tarixi əhəmiyyətindən də danışmışdır.