İyirmi iyun - Ümumdünya Qaçqınlar günü ilə bağlı keçirilməsi planlaşdırılan tədbirlər çərçivəsində BMT-nin Qaçqınlar üzrə Ali Komissarlığının xüsusi elçisi, "Oskar" mükafatı laureatı, Hollivud ulduzu xanım Ancelina Colinin müraciətini əks etdirən videoçarx hazırlanmışdır.  
Dünyada hər dəqiqə səkkiz nəfərin müharibə və ya təqib səbəbindən yurdunu tərk etməyə məcbur olduğu bildirilən 46 saniyəlik videoçarxın hazırlanmasında məqsəd beynəlxalq ictimaiyyətin diqqətini qaçqınların və məcburi köçkünlərin problemlərinə cəlb etməkdir.
Dağıdıcı müharibələr, qaçqınların və məcburi köçkünlərin yaşadıqları ağır mənzil-məişət şəraiti və onların üzləşdikləri sosial problemlərlə bağlı görüntülərin fonunda edilən müraciətdə deyilir: "Heç kim öz istəyi ilə qaçqın olmur. Bu gün dünyada 43 milyon insan didərgindir. Onları unutmayın!".

AzərTAc