İyunun 7-də Azərbaycanın xarici işlər naziri Elmar Məmmədyarov ölkəmizdə səfərdə olan Macarıstan-Azərbaycan parlamentlərarası dostluq qrupunun sədri Marton Dyöndöşinin başçılıq etdiyi nümayəndə heyəti ilə görüşmüşdür. 
Görüşdə E.Məmmədyarov ölkələrimiz arasında siyasi əlaqələrin yüksək səviyyədə olduğunu bildirmiş, bu səfərin parlament diplomatiyasının daha da inkişafına təkan verəcəyini diqqətə çatdırmışdır. Nazir qonaqlara Ermənistan-Azərbaycan, Dağlıq Qarabağ münaqişəsi ilə bağlı ətraflı məlumat vermişdir.
Səmimi qəbul üçün təşəkkürünü bildirən dostluq qrupunun sədri M.Dyöndöşi hökumətlərarası əlaqələri parlamentlər səviyyəsində də inkişaf etdirə bildikləri üçün məmnunluğunu ifadə etmişdir. M.Dyöndöşi Ermənistan-Azərbaycan, Dağlıq Qarabağ münaqişəsinin tezliklə sülh yolu ilə həll ediləcəyinə ümidvar olduğunu demişdir.