Ölkəmizdə səfərdə olan Türkiyə Respublikasının Quru Qoşunları komandanı, ordu generalı Hayri Kıvrıkoğlu iyunun 6-da Fəxri Xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə əklil qoymuşdur.
Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üzərinə gül dəstələri düzülmüşdür.
Sonra Şəhidlər Xiyabanına gələn türkiyəli general Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini ehtiramla yad etmiş, "Əbədi məşəl" abidəsinin önünə əklil qoymuşdur.
Bakının ən hündür nöqtəsindən Azərbaycan paytaxtının mənzərəsini seyr edən qonağa Şəhidlər Xiyabanının tarixi və paytaxtımızda görülən abadlıq-quruculuq işləri barədə məlumat verilmişdir.
Hayri Kıvrıkoğlu 1918-ci ildə Bakının bolşevik-erməni daşnak qoşunlarından azad edilməsi uğrunda döyüşlərdə şəhid olmuş, Azərbaycanın müstəqilliyi uğrunda mübarizədə canından keçmiş türk şəhidlərinin xatirəsinə ucaldılmış abidənin önünə əklil qoymuş, ölkəmizin azadlığı uğrunda canlarını fəda etmiş türk əsgərlərinin adları və soyadları həkk olunmuş Şəhidlik kitabəsinin üstünə gül dəstələri düzmüşdür.
Hayri Kıvrıkoğlu jurnalistlərə bildirmişdir ki, Azərbaycan Silahlı Qüvvələri ilə tanışlıq səfərinə gəlmişəm. Türkiyə və Azərbaycan Silahlı Qüvvələri arasında sıx qardaşlıq və dostluq əlaqələri vardır.
Ordu generalı Azərbaycana təlim dəstəyinin bundan sonra da davam edəcəyini diqqətə çatdırmışdır.