Fövqəladə hallar naziri, general-polkovnik Kəmaləddin Heydərov ölkənin şimal-qərb bölgəsində baş vermiş zəlzələnin nəticələrinin aradan qaldırılması istiqamətində görülən işlərlə tanış olmaq məqsədi ilə iyunun 4-də Zaqatala rayonunda olmuşdur.
Fövqəladə Hallar Nazirliyinin Zaqatala şəhərində yaradılmış operativ qərargahında nazir Kəmaləddin Heydərovun iştirakı ilə geniş müşavirə keçirilmişdir.
Zaqatala, Balakən və Qax rayonları icra hakimiyyəti başçılarının, əlaqədar dövlət qurumları mütəxəssislərinin, podratçı tikinti təşkilatları və hüquq-mühafizə orqanları rəhbərlərinin iştirak etdikləri müşavirədə dövlət başçısının göstərişlərinə uyğun olaraq zəlzələ bölgəsində həyata keçirilən kompleks tədbirlər geniş müzakirə olunmuşdur.
Nazir Kəmaləddin Heydərov zəlzələnin nəticələrinin aradan qaldırılması istiqamətində görülən işlərin qənaətbəxş olduğunu bildirmiş, qəzalı vəziyyətə düşmüş fərdi evlərin, məktəb binalarının sökülməsi və tikinti işlərinə hazırlıqla bağlı aidiyyəti qurumların rəhbərlərinə konkret tapşırıqlar vermişdir.
AzərTAc