Mən çox şadam ki, Azərbaycan kimi bir ölkəni kəşf etmişəm. Bura dünyada gördüyüm ən səmimi və mehriban insanların cəmləşdiyi bir məkandır.
Bu fikirləri AzərTAc-a məxsusi müsahibəsində Yunanıstanın "Eurovision-2012" mahnı müsabiqəsində təmsilçisi Eleftheria Eleftheriou səsləndirmişdir.
Bakıda gördüyü qonaqpərvərlik və səmimi qarşılanmadan məmnunluq ifadə edən yunanıstanlı müğənni demişdir: "Bakıda gördüyüm qonaqpərvərliyi heç yerdə görməmişəm. Buranın insanları o qədər səmimi və mehribandırlar ki, sanki öz evindəsən. Bakı elə gözəl və cazibədar bir şəhərdir ki, ondan qopmaq, ayrılmaq mümkün deyil. Buradan ayrılsam da sanki qəlbimi, könlümü burada qoyub gedirəm. Azərbaycana, Bakıya yenidən qayıdacağam. Çünki ölkənizi bir səfər çərçivəsində gəzmək, buranın gözəlliklərini duyaraq yaşamaq mümkün deyildir".