Mayın 25-də Azərbaycan Yazıçılar Birliyinin "Natəvan" klubunda xalq şairi Fikrət Qocanın "Sönən deyil bu ocaq" və "Dayanacaqda görüş" kitablarının təqdimatı olmuşdur. 
AYB-in sədri, xalq yazıçısı Anar F.Qocanın poeziyasını müasirlərindən fərqli, özünəməxsus poeziya adlandırmışdır.
Tədbirdə çıxış edənlər qocaman şairin həmişə ədəbi ictimaiyyətin diqqət mərkəzində olduğunu, bütün əsərlərində öz yaradıcı məninə sadiqliyini vurğulamışlar.
Bildirilmişdir ki, "altmışıncılar"ın ən istedadlı nümayəndələrindən sayılan Fikrət Qocanın istər "Xəzər", "Vals", "Xirosima", "İçərişəhər", "Risk", "Ana itirmişəm ana yaşında" şeirlərindəki təsir, istərsə də son illər yazdığı "Ağlama dənizim", "Hər gecə Xocalıda", "Quba dünən, bu gün" şeirlərindəki nisgil və kədər insanda unudulmaz hisslər oyadır.
Vurğulanmışdır ki, F.Qocanın "Hələlik qiyamətədək", "Ölüm ayrılıq deyil" povestlərində, eləcə də "Təkərlər geri fırlanır", "Yaralı çiçəklər" və s. poemalarında Azərbaycan gənclərinin fədakarlıqları, qəhrəmanlıqları öz əksini tapmışdır.
Tədbirdə şairin nəvəsi Günayın ifasında yeni kitablardan nümunələr səslənmişdir.
Sonda şair tədbirin təşkilatçılarına və iştirakçılarına minnətdarlığını bildirmişdir.

AzərTAc