Azərbaycan Respublikasının Baş prokuroru Zakir Qaralov Ukrayna Azərbaycanlıları Konqresinin (UAK) Donetsk vilayəti ictimai təşkilatının sədri İqbal Mahmudovun cari il mayın 9-da Makeyevka kəndində qətlə yetirilməsi ilə əlaqədar Ukraynanın Baş prokuroru Viktor Pşonkaya müraciət etmişdir.
Baş Prokurorluğun mətbuat xidmətindən bildirmişlər ki, müraciətdə cinayətin ictimai yerdə, insanların gözü qarşısında törədilməsi, habelə cinayətkarın hadisə yerindən qaçması və bu günədək saxlanılmamasının respublikada ictimai əks-səda yaratmasının narahatlıq doğurduğu qeyd edilmiş, Ukrayna hüquq-mühafizə orqanlarının yüksək peşəkarlıq göstərərək cinayətin qısa müddətdə açılması istiqamətində zəruri tədbirlər görəcəyinə əminlik ifadə olunmuşdur.
Azərbaycan Respublikasının Baş Prokurorluğu Ukraynanın səlahiyyətli orqanlarına cinayət işi üzrə istintaqa lazımi köməklik göstərməyə hazır olduğunu bildirmişdir.

AzərTAc