Odlar Yurdu Universitetində görkəmli alim, akademik Əhməd Mahmudovun anadan olmasının 89-cu ildönümünə həsr edilmiş "Azərbaycanda aqrar sahənin inkişaf meyilləri və onun perspektivləri" mövzusunda elmi-praktiki konfrans keçirilmişdir.
Tədbir bu ali məktəb və Azərbaycan İqtisadçılar İttifaqı tərəfindən təşkil edilmişdir.
Əvvəlcə konfrans iştirakçıları ulu öndər Heydər Əliyevin universitetdəki büstünün önünə gül dəstələri qoymuşlar.
Odlar Yurdu Universitetinin rektoru, professor Əhməd Vəliyev görkəmli alim Ə.Mahmudovun zəngin elmi yaradıcılığından, bu ali məktəbdə onun adının əbədiləşdirilməsi üçün reallaşdırılan tədbirlərdən danışmışdır. Bildirmişdir ki, təhsil müəssisəsində "İlin ən yaxşı müəllimi" akademik Əhməd Mahmudov adına mükafata layiq görülür.
Milli Məclisin iqtisadi siyasət komitəsinin sədri Ziyad Səmədzadə, aqrar siyasət komitəsinin sədri Eldar İbrahimov və digər çıxış edənlər akademik Ə.Mahmudovun mənalı ömür yolundan, elmə dəyərli töhfələrdən bəhs etmişlər. Görkəmli alimin iqtisad elminin inkişafında, elmi kadrların hazırlanmasında çox mühüm xidmətləri olmuşdur.
Sonra "Əhməd Mahmudov və Azərbaycanın iqtisad elmi", "Dövlətin aqrar siyasəti və respublika kənd təsərrüfatının inkişafında onun rolu" və digər mövzularda məruzələr dinlənilmişdir.

AzərTAc