Azərbaycan Respublikası Dövlət Dəniz Administrasiyasının (ARDDA) rəisi Qüdrət Qurbanovun rəhbərlik etdiyi nümayəndə heyəti Beynəlxalq Dəniz Təşkilatının Dəniz Təhlükəsizliyi Komitəsinin mayın 16-dan 25-dək Londonda keçiriləcək 90-cı sessiyasında iştirak etmək üçün bu şəhərə yola düşmüşdür.
ARDDA-nın mətbuat xidmətindən bildirmişlər ki, dənizdə təhlükəsizliyin artırılması ilə bağlı tədbirlər, yeni gəmilərin inşa edilməsinə dair standartların müəyyən edilməsi, Uzaq Məsafədən Tanınma və İzləmə sistemi (UMTİ/LRİT) ilə əlaqədar məsələlər, dövlət bayraq nəzarəti, radio əlaqə, naviqasiya təhlükəsizliyi, "Dənizçilərin hazırlanması, onlara diplom verilməsi və növbə çəkməyə dair" Beynəlxalq Konvensiyanın tətbiqi və s. kimi məsələlər sessiyanın gündəliyində duran əsas məsələlərdir.
Eyni zamanda, sessiyada son dövrlərdə beynəlxalq ictimaiyyəti dərindən narahat edən dəniz quldurluğu hallarının qarşısının alınması, bu istiqamətdə beynəlxalq təşkilatlar tərəfindən hərbi qüvvələrin səfərbər edilməsi ilə bağlı görülmüş işlər, hazırda dəniz quldurları tərəfindən əsirlikdə saxlanılan dənizçilərin vəziyyəti, onların və gəmilərin azad olunması üçün həyata keçirilən tədbirlərin gücləndirilməsi məqsədi ilə müvafiq müzakirələr aparılacaqdır.