Azərbaycan Respublikasının Prezidenti yanında Strateji Araşdırmalar Mərkəzindən (SAM) bildirmişlər ki, iyunun 8-də qurumun xüsusi layihəsi çərçivəsində "Beyin hücumu XXI əsrdə. Problemlər və ideyalar" mövzusunda aktual müzakirələr silsiləsindən ilk "dəyirmi masa" keçiriləcəkdir.
Məqsəd ölkəmizin ərazi bütövlüyünün təmin olunması, intellektual-elmi, sosial-siyasi, iqtisadi, mədəni və s. sahələrdə inkişafın aktual problemlərinin müzakirəsi və həlli yollarının müəyyən edilməsidir.
"Dəyirmi masa"da Azərbaycanın beyin və ideya potensialının səfərbər edilməsi, analitik və ekspert cəmiyyətinin dövlətçiliyin inkişafına töhfəsinin artırılması, müxtəlif istiqamətlərdə könüllü dialoqa əsaslanan əməkdaşlığın, yeni layihələrin dəstəklənməsi və həyata keçirilməsi ilə qeyri-hökumət təşkilatlarının dövlət və cəmiyyət arasında intellektual dialoq məkanının təşkili məsələlərinin müzakirə olunması nəzərdə tutulmuşdur.
AzərTAc