İsveç Rikstaqı İsveç Azərbaycanlılar Konqresinin sədri Emil Mirzəyevi və onun müavini Elyar Məhərrəmovu bu il mayın 9-da keçiriləcək Dağlıq Qarabağ münaqişəsi barədə qətnamənin müzakirəsinə dəvət etmişdir. Bu barədə APA-ya İsveç Azərbaycanlılar Konqresindən məlumat vermişlər.
Qəbul olunmuş qaydaya əsasən qətnamə barədə parlamentdə təmsil olunan 7 partiyanın nümayəndələri ardıcıllıqla çıxış edəcəklər. Daha sonra Rikstaqda Yaşıllar qrupunun rəhbəri, qətnamə layihəsinin müəllifi Mehmet Kaplan çıxış edəcək. Çıxışdan sonra M.Kaplan parlamentarilərin suallarına cavab verəcək.
Müzakirələrin sonunda qətnamə layihəsinə dair qərarın qəbul olunması gözlənilir.