Bu il aprel ayının 1-nə olan məlumata görə Azərbaycan əhalisinin sayı ilin əvvəlindən 29,1 min nəfər və ya 0,3 faiz artaraq 9264,2 min nəfərə çatmışdır.
Dövlət Statistika Komitəsindən "APA-ECONOMICS"ə verilən məlumata görə, əhalinin sıxlığı 1 kvadratkilometrə 107 nəfər olub: "Əhalinin 49,6 faizini kişilər, 50,4 faizini qadınlar təşkil edir, 22 faizi 0-14 yaşda, 72 faizi 15-64 yaşda, 6 faizi 65 və yuxarı yaşda olanlardır".
Komitədən bildirilib ki, hazırda hər 1 000 nəfər kişiyə 1 015 nəfər qadın düşür.
Cari ilin ilk üç ayı ərzində Azərbaycanda 43,1 min körpə doğulub və ötən ilin müvafiq dövrü ilə müqayisədə əhalinin hər 1 000 nəfərinə hesabı ilə doğumun səviyyəsi 18,9-dan 19-dək artıb. Doğulanların 53,8 faizi oğlanlar, 46,2 faizi isə qızlar olub.
"Hesabat dövründə ölkədə 14,4 min ölüm halı qeydə alınıb və 2011-ci ilin müvafiq dövrü ilə müqayisədə əhalinin hər 1000 nəfərinə hesabı ilə ölüm eyni səviyyədə (6,3) qalaraq dəyişməyib", - deyə komitədən bildirilib.