Aprelin 20-də Moldovanın "Poşta Moldovei" dövlət müəssisəsi Azərbaycan xalqının ümummilli lideri Heydər Əliyevə həsr olunmuş dörd poçt markasından ibarət seriya buraxmışdır.
Azərbaycanın Moldovadakı səfirliyindən AzərTAc-a bildirmişlər ki, poçt markaları kiçik vərəqə formasında buraxılmışdır. Hər vərəqədə dörd növdə 24 poçt markası vardır. Hər bir markanın nominalı 1,2 leylik poçt tarifinə bərabərdir.
Poçt markalarının rəsmi təqdimatının görkəmli siyasi xadimin ad günü münasibətilə cari ilin mayında keçirilməsi planlaşdırılır. Təqdimata Moldova Respublikasının hökumət və dövlət rəhbərləri, parlamentin deputatları, Nazirlər Kabinetinin üzvləri, səfirliklərin və Kişineuda akkreditə olunmuş beynəlxalq təşkilatların nümayəndəliklərinin başçıları, alimlər, mədəniyyət xadimləri, habelə KİV-lərin nümayəndələri və Moldova Azərbaycanlıları Konqresinin üzvləri dəvət olunacaqlar.

AzərTAc