Rabitə və İnformasiya Texnologiyaları Nazirliyinin əməkdaşlarından ibarət Azərbaycan nümayəndə heyəti İstanbulda keçirilən Caspian Telecoms 2012 adlı regional konfrans-sərgidə iştirak edir. Bu barədə nazirliyin mətbuat xidməti məlumat yaymışdır.  
Son illər ərzində tədbir davamlı şəkildə genişlənməklə Xəzər regionu, MDB ölkələri, Türkiyə və Mərkəzi Asiya üçün telekommunikasiya və informasiya texnologiyaları üzrə aparıcı forum kimi şöhrət tapıb. Konfrans çərçivəsində Azərbaycan, Rusiya, Türkiyə, Qazaxıstan, Özbəkistan, Gürcüstan və regionun digər ölkələrini təmsil edən rəsmi nümayəndə heyətləri regional əməkdaşlıq və sosial-iqtisadi inkişafın aktual məsələlərini və potensial imkanlarını müzakirə etmək imkanı əldə etmişlər.
Tədbirin müzakirə və məruzələri rabitə siyasəti, perspektiv texnologiyalar və qabaqcıl texnologiyaların tətbiqi məsələlərini əhatə edir. Azərbaycan təmsilçiləri konfransda ölkənin bölgələrində rabitə və informasiya texnologiyalarının inkişafı, genişzolaqlı internet xidmətlərinin kütləvi tətbiqi haqqında məruzə ilə çıxış edəcəklər, eləcə də Trans-Avrasiya Super İnformasiya Magistralı (TASİM) layihəsinin həyata keçirilməsindən söhbət açacaqlar. Konfransa rabitə administrasiyalarının nümayəndələri ilə yanaşı avadanlıq istehsalçıları, rabitə operatorları, maliyyə qurumları və beynəlxalq təşkilatların təmsilçiləri də qatılıblar.

M.MÜKƏRRƏMOĞLU, "Xalq qəzeti"