"Azərbaycan Respublikasında dəmir yolu nəqliyyat sisteminin 2010-2014-cü illərdə inkişafına dair Dövlət Proqramı"nın icrası çərçivəsində Bakı-Böyük Kəsik istiqamətində 317 kilometr yolun əsaslı təmiri davam edir. 
"Azərbaycan Dəmir Yolları" Qapalı Səhmdar Cəmiyyəti Mətbuat Katibliyinin rəisi Nadir Əzməmmədovdan aldığımız məlumata görə, 17 aprel 2012-ci ildə Mingəçevir-Yevlax mənzilində daha 5 kilometr yolun əsaslı təmiri başa çatdı. "Azərbaycan Dəmir Yolları" Qapalı Səhmdar Cəmiyyətinin sədr müavini Qurban Nəzirov təmir prosesini izləyən kütləvi informasiya vasitələri nümayəndələrinə bildirdi ki, bununla da indiyə kimi Bakı-Böyük Kəsik-Bakı sahəsində əsaslı təmir olunan hissə 80 kilometrə çatdı. Aprel ayı ərzində Mingəçevir-Yevlax mənzillərində daha 5 kilometr yol əsaslı təmir ediləcək.
Təmir işləri İnfrastruktur Departamenti tərəfindən Bakı-Böyük Kəsik-Bakı sahəsində əsaslı təmir olunması nəzərdə tutulan kilometrlərin təmir ardıcıllığı siyahısı əsasında aparılır. Əsaslı təmir işlərini "Azərbaycan Dəmir Yolları" QSC "Dəmiryolservis" MMC-nin və İnfrastruktur Departamentinin müvafiq qurumları həyata keçirir.
Qeyd edək ki, əsaslı təmir işlərinə 10 iyun 2011-ci ildə Tatlı-Ağstafa sahəsinin 97-ci kilometrində start verilib.

Qabil YUSİFOĞLU, "Xalq qəzeti"