Dövlət Sərhəd Xidmətinin (DSX) zabitləri üçün Bakının Nərimanov rayonunda inşa edilmiş yaşayış binası may ayının sonlarında sərhədçi zabitlərin ixtiyarına veriləcək.
DSX-dan APA-ya verilən məlumata görə, hazırda binadakı mənzillərdə təmir işləri aparılır. Bunun üçün büdcədən vəsait ayrılmışdır.
Bəzi media orqanlarında sərhədçi zabitlər üçün inşa olunan mənzillərin "Eurovision" mahnı yarışması üçün xarici qonaqların istifadəsinə veriləcəyi barədə yayılan məlumat təsdiqlənmişdir. DSX-dan bildirmişlər ki, müsabiqə ərəfəsində Bakıya gələcək qonaqların çoxluğu ilə əlaqədar, istifadəyə hazır olan bu yaşayış kompleksi müvəqqəti olaraq xarici qonaqların istifadəsinə veriləcək. Yarışma başa çatdıqdan sonra isə həmin lüks mənzillər ən müasir otellər səviyyəsində təchiz olunmuş formada zabitlərə paylanacaq.
Sərhədçilərə verilən mənzillərdə kondisioner, istilik təchizatı, telefon, kabel televiziyası, internet xətti, hər otaqda televizor, soyuducu olacaq. Bunlar mənzilə köçəcək zabitlərin ixtiyarında qalacaq. "Eurovision"la əlaqədar olaraq kompleksdə böyük yeməkxana, əyləncə mərkəzi və s. imkanlar yaradılacaq.