Mayın 9-13-də ümummilli lider Heydər Əliyevin xatirəsinə həsr olunmuş ilk beynəlxalq velotur keçiriləcəkdir. Azərbaycan Velosiped İdmanı Federasiyasından verilən məlumata görə, velotur ölkəmizdə bu idman növü üzrə keçiriləcək ilk peşəkar yarış olacaqdır. Beş mərhələdən ibarət tur Bakı küçələrində komanda yarışları ilə başlayacaq və beş gündən sonra yenidən paytaxtda yekunlaşacaqdır.
Bakıda keçiriləcək komanda yarışlarından sonra peloton Böyük Qafqaz dağlarına doğru istiqamətlənəcəkdir. 2-4-cü mərhələlər ölkəmizin mənzərəli guşələrindən keçməklə İsmayıllı və Qəbələdə başa çatacaqdır. Veloturun şimal nöqtəsi olan Şəkiyə çatdıqdan sonra yarış iştirakçıları Bakıya qayıdacaq və final mərhələsi paytaxtımızın mərkəzi küçələrində keçiriləcəkdir.
Velotur Beynəlxalq Velosipedçilər İttifaqının (UCİ) təqvim planına daxil edilmiş və 2.2 U-23 (19-23 yaş həddi) kateqoriyasına aid UCİ-nin kontinental turudur. Azərbaycanda ilk dəfə keçiriləcək peşəkar velosiped idmanı yarışına hər biri 6 idmançıdan ibarət olan və dünyanın ən müxtəlif ölkələrini təmsil edən komandalar qatılacaqdır.
Veloturun marşrutu çoxsaylı beynəlxalq yarışların təşkilində böyük təcrübə toplamış, o cümlədən 2007-ci ildə UCİ-nin himayəsi altında keçirilmiş şose üzrə dünya çempionatının təşkilatçısı olan Albrext Roeder tərəfindən planlaşdırılmışdır.

"Xalq qəzeti"