Binəqədi Rayon İcra Hakimiyyəti və Rəsulzadə Bələdiyyəsinin təşkilatçılığı ilə Milli Qəhrəman Fərhad Hümbətovun Rəsulzadə qəsəbəsində qəhrəmanın adını daşıyan parkda anım mərasimi keçirilmişdir. 
Tədbir iştirakçıları əvvəlcə F. Hümbətovun abidəsi önünə əklil qoymuş, gül-çiçək dəstələri düzmüşlər. Sonra Milli Qəhrəmanın, eləcə də torpaqlarımızın azadlığı uğrunda şəhid olan insanların ruhu bir dəqiqəlik sükutla yad olunmuşdur. "Milli Qəhrəmanları Tanıtma" İctimai Birliyinin sədri Elşən Uluxanlı, Milli Qəhrəmanın anası Salatın Hümbətova, Binəqədi Rayon İcra Hakimiyyəti başçısının müavini Eldar Ağayev F. Hümbətovun keçdiyi ömür yolundan danışmışlar.
Xatırladılmışdır ki, Fərhad 1992-ci il martın 7-də Şuşa, Kosalar, Xankəndi istiqamətlərində ağır döyüş yolu keçmiş və həmin ilin martın 29-da Xocalının Kosalar kəndi uğrunda gedən döyüşlərdə qəhrəmancasına həlak olmuşdur. Azərbaycan Prezidentinin 7 iyun 1992-ci il tarixli fərmanı ilə Fərhad Hümbətova ölümündən sonra "Azərbaycanın Milli Qəhrəmanı" adı verilmişdir. O, Bakıda, Şəhidlər Xiyabanında dəfn edilmişdir. Binəqədi rayonunda adına park salınmış və burada büstü qoyulmuşdur.
Mərasimin sonunda 99 saylı tam orta məktəbin şagirdlərinin ifasında ədəbi-bədii kompozisiya göstərilmişdir.

V.BAYRAMOV, "Xalq qəzeti"