Martın 30-da Baş nazirin müavini Abid Şərifov aidiyyəti qurumların rəhbərləri və mütəxəssislərlə birlikdə Şamaxı rayonunun Muğanlı kəndində olmuş, torpaq sürüşməsi nəticəsində yaranmış vəziyyətlə əlaqədar təbii fəlakət sahələrinə baxış keçirmişdir. 
Əvvəlcə Bakı-Şamaxı-Yevlax magistral yolunun Muğanlı-Ağsu hissəsini gəzən A.Şərifov yollarda, xüsusən Ağsu aşırımında baş vermiş sürüşmə sahələrindəki vəziyyətlə tanış olmuşdur. Mütəxəssislərin rəyi nəzərə alınmaqla təhlükəli hissələrin təmir edilməsi, martın 26-dan bütün nəqliyyat vasitələri üçün bağlanan yolun yüngül minik avtomobilləri üçün açılması qərara alınmışdır.
Sonra Muğanlı kəndində sakinlərlə görüş keçirilmişdir. Görüşdə sürüşmə sahəsinə düşən 46 yaşayış evinin sakinlərinin rəyi nəzərə alınaraq onlar üçün Meysəri kəndi yaxınlığında, Muğanlı bələdiyyəsinə məxsus ərazidə yeni evlərin tikilməsi məqsədəuyğun hesab edilmişdir. Mütəxəssislərə ərazidə gələcəkdə torpaq sürüşməsi və digər təhlükəli vəziyyətin yaranıb-yaranmayacağını dəqiqləşdirmək məqsədilə mühəndis-geoloji tədqiqatların aparılması üçün tapşırıqlar verilmişdir.