Əlyazmalar İnstitutu Azərbaycan əlyazmalarını vahid mərkəzdə toplayacaq

Xarici ölkələrdəki əlyazma kataloqlarında Azərbaycana aid 12 min əlyazma var. Amma bu, xarici ölkələrdə Azərbaycanla bağlı olan əlyazmaların çox az hissəsidir. Xarici ölkələrdəki əlyazmalar bundan qat-qat çoxdur.
Bu barədə APA-ya Azərbaycan Milli Elmlər Akademiyasının (AMEA) Məhəmməd Füzuli adına Əlyazmalar İnstitutunun direktor əvəzi Paşa Kərimov məlumat vermişdir.
Onun sözlərinə görə, Azərbaycanla bağlı daha çox əlyazma İran və Türkiyədədir. Amma dünyanın elə bir Şərq əlyazması kitabxanası yoxdur ki, orada Azərbaycan əlyazmaları olmasın: "Əfqanıstan, Pakistan, Hindistan əlyazmalarını bütünlüklə, İran isə böyük hissəsini kataloqlaşdırmayıb. Bu səbəbdən də biz bu əlyazmaların dəqiq sayını deyə bilmirik".
P. Kərimov bildirmişdir ki, Əlyazmalar İnstitutu bütün dünyada olan Azərbaycan əlyazmalarını vahid mərkəzdə toplayacaq: "Belə bir təklif Ərəb Liqası tərəfindən də edilib. Onlar ərəb əlyazmalarının surətlərini bir mərkəzdə toplayırlar. Biz də dünyada olan Azərbaycan əlyazmalarının surətlərinin ölkəyə gətirilməsi işini həyata keçirəcəyik. Artıq bununla bağlı institutda ayrıca bölmə yaradılmışdır".