"Qlobal" Məhdud Məsuliyyətli Müəssisənin marketinq və ictimaiyyətlə əlaqələr üzrə meneceri Aynurə Quliyevanın qanunsuz hərəkətləri barədə Bakı şəhər sakini Elnarə İsmayılovanın Baş Prokuror yanında Korrupsiyaya Qarşı Mübarizə İdarəsinə daxil olmuş müraciəti üzrə araşdırma aparılmışdır.
Araşdırma zamanı müəyyən edilmişdir ki, Aynurə Quliyeva Elnarə İsmayılovaya "Şengen" vizasının əldə edilməsi üçün 2200 manat tələb olunduğunu bildirmiş, həmin pulun 1800 manatını sonuncudan almaqla onun adına iş yeri, bankda hesabın olması barədə saxta arayışlar hazırlamış və həmin sənədləri ölkəmizdə fəaliyyət göstərən xarici dövlətin səfirliyinə təqdim etmişdir.
Baş Prokurorluğun mətbuat xidmətindən bildirmişlər ki, fakta görə Cinayət Məcəlləsinin 308.1-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi açılmışdır, istintaq aparılır.

AzərTAc