Yunanıstan Ermənistan-Azərbaycan, Dağlıq Qarabağ münaqişəsinə çox həssaslıqla yanaşır. Bu sözləri martın 27-də Yunanıstanın Azərbaycandakı səfiri İoannis Metaksas demişdir.
Diplomat vurğulamışdır ki, Yunanıstan ATƏT-in Minsk qrupunun münaqişənin nizamlanması istiqamətindəki səylərini dəstəkləyir.
Münaqişənin tezliklə ATƏT-in Minsk qrupu çərçivəsində öz həllini tapacağına ümidvar olduğunu bildirən səfir demişdir: "Azərbaycanda işlədiyim müddətdə problemlə yaxından tanış olmuşam. Münaqişənin yaratdığı çətinliklərdən, çoxlu sayda qaçqın və məcburi köçkünün olmasından xəbərdaram. Onlar tezliklə öz doğma yurdlarına qayıtmalıdırlar".