Martın 15-də Xəzər rayonunun Zirə qəsəbəsində istixana kompleksinin açılışı olmuşdur. Açılışda kənd təsərrüfatı naziri İsmət Abasov iştirak etmişdir.
Nazir demişdir: "Bu cür istixanaların yaradılması respublikamız üçün çox vacibdir. Bunların istifadəyə verilməsi iş adamları üçün əlverişli şərait yaradır. Ümumilikdə, istixanaların istifadəyə verilməsi ərzaq təhlükəsizliyinin təmin olunmasına kömək edəcək, həmçinin istehsal edilən tərəvəz məhsulları xarici ölkələrə də ixrac olunacaqdır. İndiyədək ölkədə 9 istixana kompleksi istifadəyə verilmişdir və bu işlər davam etdirilir".
Nazir diqqətə çatdırmışdır ki, bu istixanaların tikilməsi üçün alınmış kreditin 10 faizi ilkin mərhələdə ödənilir. Qalan hissəsi isə 10 il müddətinə qaytarılır.
Vurğulanmışdır ki, Zirə qəsəbəsindəki istixana kompleksi müasir standartlara cavab verir. Bu istixananın tikilməsi üçün 3 milyon manatdan çox vəsait xərclənmişdir ki, bunun da 300 min manatı Sahibkarlığa Kömək Milli Fondu tərəfindən güzəştli kredit kimi verilmişdir. 2 hektar ərazidən illik 800 ton məhsulun istehsal edilməsi proqnozlaşdırılır. Toxumlar Hollandiyadan gətirilmişdir.
Daha sonra nazir İsmət Abasov istixana kompleksindəki şəraitlə yaxından tanış olmuşdur.