Martın 7-də Naxçıvan şəhərində Azərbaycanın xarici işlər naziri Elmar Məmmədyarov Türkiyənin xarici işlər naziri Əhməd Davudoğlu ilə görüşmüşdür. 
Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə nazir Elmar Məmmədyarov Azərbaycanın Türkiyənin dəstəyini davamlı şəkildə hiss etdiyini diqqətə çatdırmış, iki qardaş ölkə arasında münasibətlərin səviyyəsindən məmnunluğunu ifadə etmişdir.
Azərbaycanın xarici işlər naziri türkiyəli həmkarı ilə Naxçıvan görüşünün məhsuldar olduğunu və bunun mütəmadi olaraq davam etdirilməsinin vacibliyini qeyd etmişlər.
Görüşdə Azərbaycan ilə Türkiyə arasında ikitərəfli əlaqələr, regionda cərəyan edən proseslər, beynəlxalq təşkilatlar çərçivəsində əməkdaşlıq və bir sıra qarşılıqlı maraq kəsb edən məsələlər barədə fikir mübadiləsi aparılmışdır.