Bakıda səfərdə olan Rusiya Federasiyası Tatarıstan Respublikasının Baş naziri İldar Xalikovun rəhbərlik etdiyi nümayəndə heyəti Azərbaycan Respublikasının fövqəladə hallar naziri, general-polkovnik Kəmaləddin Heydərovla görüşmüşdür. 
Fövqəladə Hallar Nazirliyindən (FHN) AzərTAc-a bildirmişlər ki, görüşdə Kəmaləddin Heydərov Azərbaycan ilə Tatarıstan arasında ikitərəfli münasibətlərin, o cümlədən fövqəladə halların idarə olunması sahəsində əməkdaşlığın inkişaf etdirilməsi üçün yaxşı imkanların olduğunu vurğulamış, nazirliyin strukturu və fəaliyyəti barədə qonağa ətraflı məlumat vermişdir.
İ.Xalikov Azərbaycan ilə Tatarıstan arasında dostluq və əməkdaşlıq münasibətlərinin bütün sahələrdə inkişaf etməsini yüksək qiymətləndirmiş, hər iki respublikanın müvafiq dövlət qurumları arasında əməkdaşlığın dərinləşməsinin vacibliyini vurğulamışdır.
Görüşdə əlaqələrin daha da genişləndirilməsi ilə bağlı məsələlər ətrafında geniş fikir mübadiləsi aparılmışdır.
Qonaqlar FHN-in Böhran Vəziyyətlərində İdarəetmə Mərkəzində olmuş, mərkəzin fəaliyyəti və "112" qaynar xətti barədə ətraflı məlumatlandırılmışlar.