Rusiya Federasiyasının Federal Məclisi ilə Azərbaycan Respublikasının Milli Məclisi arasında ikitərəfli əməkdaşlıq üzrə parlamentlərarası komissiyanın 9-cu iclasında iştirak etmiş Rusiya Dövlət Duması sədrinin müavini Valeri Yazov bildirmişdir ki, iki ölkənin parlamentlərarası əlaqələri hazırda yüksələn xətt üzrə inkişaf edir.
O, Azərbaycanın milli bayramı - Respublika Günü münasibətilə azərbaycanlı həmkarlarını təbrik edərək demişdir: "Azərbaycanla ənənəvi dostluq, səmimi münasibətlərimiz vardır. Biz bir çox strukturlarla əməkdaşlıq edirik. Azərbaycanın neft-qaz kompleksi bizim üçün son dərəcə böyük əhəmiyyətə malikdir. Biz inkişaf, neft, neft məhsulları və qaz ixracı məsələləri ilə bağlı kollegial əsasda qarşılıqlı fəaliyyət göstəririk".
V.Yazov əmin olduğunu bildirmişdir ki, Federal Məclis və Milli Məclisin parlamentlərarası komissiyasının iclası Rusiya və Azərbaycan münasibətlərinin inkişafına yeni təkan verəcəkdir.

Asya HACIZADƏ AzərTAc-ın xüsusi müxbiri
Moskva