Martın 2-də Azərbaycanın Tacikistanda yeni təyin olunmuş səfiri Abbasəli Həsənov etimadnaməsinin surətini bu ölkənin xarici işlər naziri Xamraxon Zərifiyə təqdim etmişdir.
Təqdimetmə mərasimindən sonra keçirilən görüşdə Azərbaycan ilə Tacikistan arasında bütün istiqamətlərdə, o cümlədən ticarət-iqtisadi sahədə əlaqələrin genişləndirilməsi məsələləri müzakirə olunmuş, qarşılıqlı maraq doğuran layihələrin həyata keçirilməsi ilə bağlı fikir mübadiləsi aparılmışdır.
Nazir ölkələrimiz arasında müqavilə-hüquq bazasının möhkəmləndirilməsi vacibliyini bildirmiş, investisiyaların qoyulması və qarşılıqlı ticarətin yüksəldilməsi məsələlərinə toxunmuşdur.
X.Zərifi nəqliyyat-tranzit sahəsində əlaqələrin genişləndirilməsi və Azərbaycanda Tacikistan üçün neftçi kadrlarının hazırlanması istiqamətində əməkdaşlığa da xüsusi diqqət yetirmişdir.
Abbasəli Həsənov ölkələrimiz arasında bu və digər sahələrdə əlaqələrin genişləndirilməsi üçün maksimum səy göstərəcəyini bildirmişdir.

Qulu KƏNGƏRLİ AzərTAc-ın xüsusi müxbiri 
Düşənbə