Bu ümumxalq yürüşü xalqımızın, nəinki Xocalı soyqırımı qurbanlarının xatirəsinə həsr edilmiş aksiyası, həm də yüz ildən çoxdur ki, Azərbaycan xalqına və ümumilikdə türk dünyasına qənim kəsilən rəzil erməni şovinizminin iyrənc, insanlığa sığmayan əməllərini dünyaya çatdırmaq istəyən haqq səsidir. 
Son vaxtlar Ermənistan-Azərbaycan, Dağlıq Qarabağ münaqişəsi ilə əlaqədar dövlətimizin müxtəlif səviyyələrdə həyata keçirdiyi işlər öz nəticəsini verməkdədir. Artıq dünya birliyi kimin kim olduğunu, Ermənistanın təcavüzkar olduğunu, onun yalnız özünə məxsus əxlaqsız siyasət yürütdüyünü anlayır.
Biz müdafiə qabiliyyətimizi, hərbi potensialımızı artırmaqla yanaşı beynəlxalq səviyyədə ədalətli mövqeyimizi, təcavüzə və soyqırımına məruz qalmağımızı daha qətiyyətlə bəyan etməli, bu istiqamətdə təbliğat işini daha da gücləndirməliyik. Bu baxımdan Xocalı soyqırımının 20-ci ili ilə əlaqədar keçirilmiş ümumxalq yürüşünü hər bir cəhətdən düzgün və zəruri aksiya hesab edir və 31 Mart Azərbaycanlıların Soyqırımı Günündə də belə aksiyanın keçirilməsini istərdim.

Arif RÜSTƏMOV, fəlsəfə doktoru, Bakı Dövlət Universitetinin Sosial elmlər və psixologiya fakültəsinin dekan müavini