Fevralın 28-də Fransa Konstitusiya Şurası Senatın qəbul etdiyi qondarma "erməni soyqırımı"nı inkar edənlərin cəzalandırılmasını nəzərdə tutan qanunu ləğv etmişdir. 
Qanuna Konstitusiya Şurasında baxılmasının təşəbbüsçülərindən olan senator Jak Mezarın qərarın açıqlanmasından sonra mətbuat konfransı təşkil edəcəyi bildirilmişdir.
Xatırladaq ki, qondarma "erməni soyqırımı"nın inkarına görə cinayət məsuliyyətinin tətbiqi barədə qanun layihəsini Prezident Nikolya Sarkozinin də dəstəyi ilə Fransa Senatı yanvarın 23-də təxminən səkkiz saatlıq müzakirələrdən sonra qəbul etmişdi.
Qanunun qəbul edilməsindən sonra Fransa Senatında bu qanunun ləğv edilməsi məqsədi ilə Konstitusiya Şurasına müraciət etmək üçün senator Jak Mezarın təşkilatçılığı ilə 77 imza toplanmışdı. Lazım olan imza sayını artıqlaması ilə əldə edən deputatlar və senatorlar Fransa Konstitusiyasının 33-cü maddəsinə və ifadə azadlığına zidd olduğu səbəbi ilə qanunun ləğvini tələb etmişdilər.

AzərTAc