Fevralın 22-də Bakıda Azərbaycan Həmkarlar İttifaqları Konfederasiyası (AHİK) və Beynəlxalq Əmək Təşkilatının (BƏT) birgə təşkilatçılığı ilə "Diskriminasiyaya və müdafiəsiz əməyə qarşı mübarizədə Beynəlxalq Əmək Təşkilatının rolu" mövzusunda beynəlxalq konfrans keçirilmişdir. 
Konfransda AHİK sədrinin müavini İlyas Əliyev çıxış edərək tədbirin əhəmiyyətindən danışmışdır. Bildirilmişdir ki, işçilər yalnız statusuna, cinsinə, yaşına görə deyil, həm də işəgötürənlə bağlanan müqavilənin növü və ya onun yoxluğu ilə əlaqədar diskriminasiya riskinə məruz qalırlar. Müqavilələri müdafiə olunmayan işçilərin əksəriyyəti qeyri-formal iqtisadiyyatda işləyən və ya hüquqi statusu olmayan miqrant fəhlələrdir.
Diqqətə çatdırılmışdır ki, bu konfrans ikipilləli əmək bazarında mövcud olan diskriminasiya hallarına qarşı mübarizədə və işçilərin müdafiəsinin yaxşılaşdırılmasında həmkarlar ittifaqlarının rolunu müəyyənləşdirmək məqsədi daşıyır.
Konfransın əhəmiyyətindən danışan BƏT-in baş mütəxəssisi Sergius Qlovaskas bildirmişdir ki, belə tədbirlərin keçirilməsi maarifləndirmə baxımından mühüm addımdır. AHİK-in beynəlxalq əlaqələrini müsbət qiymətləndirən BƏT-in nümayəndəsi Azərbaycan ilə təmsil etdiyi qurumun əlaqələrinin sıx inkişaf etdiyini demişdir. S.Qlovaskas vurğulamışdır ki, AHİK-in gənclərin, qadınların, qaçqınların, miqrantların hüquqlarının müdafiəsi istiqamətində gördüyü işlər BƏT tərəfindən yüksək qiymətləndirilir. İqtisadiyyatı sürətlə inkişaf edən Azərbaycanda işçilərin əmək hüquqlarının müdafiəsi AHİK-in əsas vəzifəsidir. Təsadüfi deyildir ki, Azərbaycan son illər əmək hüquqlarının qorunması istiqamətində əhəmiyyətli addımlar atmışdır.
Sonra konfrans "Hamı üçün layiqli əmək", "Qeyri-formal iqtisadiyyat: həmkarlar ittifaqlarının cavabı", "Əmək miqrasiyası: əmək miqrantlarının müdafiəsində və beynəlxalq əməkdaşlıqda həmkarlar ittifaqlarının rolu", "Həmkarlar ittifaqlarının fəaliyyət planının hazırlanması" mövzularında sessiyalarda işini davam etdirmişdir.
Sonda işçi qruplarının gördüyü işlər müzakirə olunmuşdur.

AzərTAc