Azərbaycan Respublikası Dövlət Neft Fondu (ARDNF) investisiya portfelinin şaxələndirilməsi və gəlirliliyinin artırılması məqsədi ilə qızıla investisiya yatırmağa başlamışdır. Azərbaycan Prezidentinin 2011-ci il 29 dekabr tarixli Fərmanı ilə təsdiq edilmiş Neft Fondunun İnvestisiya Siyasətinə əsasən 2012-ci ildə Fondun investisiya portfelinin məcmu dəyərinin 5 faizə qədəri qızıla investisiya edilə bilər.
ARDNF-in mətbuat xidmətindən AzərTAc-a bildirmişlər ki, bu məqsədlə, fevralın 1-dən etibarən London Qiymətli Metallar Bazarı İştirakçıları Assosiasiyasının market-meyker üzvü olan banklardan həmin qurum tərəfindən tətbiq edilən tələblərə uyğun olan qızıl külçələrinin alışına başlanılmışdır.
1987-ci ildən fəaliyyət göstərən London Qiymətli Metallar Bazarı İştirakçılarının Assosiasiyası Londonun qızıl və gümüş külçələr bazarındakı beynəlxalq bankları, istehsalçıları, daşıma və "saflaşdırma şirkətlərini əhatə edir.