Fevralın 14-də Pakistan Milli Kitabxanasında Heydər Əliyev guşəsinin açılış mərasimi və Azərbaycan-Pakistan münasibətlərinə həsr edilmiş kitabın təqdimatı keçirilmişdir.
Azərbaycanın Pakistandakı səfirliyindən APA-ya verilən məlumata görə, mərasimdə Pakistanın aparıcı universitetlərinin professor-müəllim heyəti, habelə ölkənin tanınmış ictimai-siyasi xadimləri və kütləvi informasiya vasitələrinin nümayəndələri iştirak etmişlər. Guşədə Heydər Əliyevin həyat və fəaliyyətindən bəhs edən ədəbiyyat, sənədlərin nüsxələri, fotolar və digər materiallar yerləşdirilmişdir.
Açılış mərasimində çıxış edən Milli Kitabxananın baş direktoru Məhəmməd Nazir Heydər Əliyevin həyatı və siyasi fəaliyyətindən danışaraq onun müstəqil Azərbaycanın yaranmasında oynadığı müstəsna rolu qeyd etmişdir. O, guşədə yerləşən materialların geniş kütlələr üçün açıq olduğunu bildirərək onlarla tanışlığın Azərbaycanın Pakistanda daha yaxından tanınması yolunda böyük rol oynayacağını vurğulamışdır.