Nazirlər Kabineti "Vətən uğrunda həlak olanların xatirəsinin əbədiləşdirilməsi haqqında" Azərbaycan Respublikası Qanununun tətbiq edilməsi barədə" Azərbaycan Respublikası Prezidentinin 1999-cu il 14 may tarixli fərmanına əsasən, Təhsil Nazirliyinin və Bakı Şəhər İcra Hakimiyyətinin təkliflərini nəzərə alaraq Azərbaycanın Milli Qəhrəmanı Riad Fikrət oğlu Əhmədovun xatirəsinin əbədiləşdirilməsi barədə qərar qəbul etmişdir. 
Qərara əsasən, Bakı Şəhər İcra Hakimiyyəti Azərbaycanın Milli Qəhrəmanı Riad Əhmədovun yaşadığı binaya və adını daşıdığı Bakı şəhərindəki 203 nömrəli tam orta məktəbə onun xatirə lövhəsinin vurulmasını təmin etməlidir.
Qərar imzalandığı gündən - fevralın 1-dən qüvvəyə minmişdir.
Nazirlər Kabinetinin mətbuat xidmətindən bildirmişlər ki, qərarın tam mətni ilə Azərbaycan Respublikasının Qanunvericilik Toplusunda tanış olmaq mümkündür.

AzərTAc