Avropa Şurası Parlament Assambleyasının (AŞPA) Monitorinq Komitəsinin Azərbaycan üzrə həmməruzəçiləri Jozef Debono Qrex və Pedro Aqramunt yanvarın 31-də Bakıya gəlmişlər.
Milli Məclisin beynəlxalq münasibətlər və parlamentlərarası əlaqələr komitəsi sədrinin müavini, Azərbaycanın AŞPA-dakı nümayəndə heyətinin üzvü Sevinc Fətəliyeva AzərTAc-a bildirmişdir ki, həmməruzəçilər səfər çərçivəsində Milli Məclisdə, Ədliyyə Nazirliyində, Ali Məhkəmədə, Ombudsman aparatında bir sıra görüşlər keçirəcəklər.
AŞPA-nın həmməruzəçiləri siyasi partiyaların liderləri, QHT rəhbərləri və media nümayəndələri ilə də görüşəcək, Qubaya səfər edəcəklər.
Səfərin məqsədi Azərbaycanın Avropa Şurası qarşısında götürdüyü öhdəliklərin icra vəziyyəti, demokratik təsisatların və vətəndaş cəmiyyəti institutlarının vəziyyəti ilə tanış olmaqdır.

AzərTAc