Azərbaycanın Avstriya, Slovakiya və Sloveniyadakı səfiri Qalib İsrafilov yanvarın 31-də Lyublyanada Prezident Administrasiyasında keçirilmiş rəsmi mərasimdə etimadnaməsini Sloveniyanın Prezidenti Danilo Türkə təqdim etmişdir.
Təqdimetmə mərasimindən sonra səfir Q.İsrafilovun Prezident D.Türklə söhbəti olmuşdur. Söhbət zamanı ölkələrimiz arasında ikitərəfli münasibətlərin yüksək səviyyədə inkişafı məmnunluqla qeyd edilmiş, siyasi-iqtisadi və humanitar-mədəniyyət sahələrində əməkdaşlığın genişləndirilməsi barədə fikir mübadiləsi aparılmışdır.
Sloveniyaya səfəri çərçivəsində səfir Q.İsrafilov Xarici İşlər Nazirliyində və Nova Qoritsa şəhərinin meriyasında bir sıra görüşlər keçirmişdir.
Xatırladaq ki, Azərbaycanın Avstriyadakı səfiri Qalib İsrafilov Azərbaycan Respublikasının Prezidenti İlham Əliyevin 2011-ci il 16 avqust tarixli Sərəncamı ilə eyni zamanda ölkəmizin Sloveniya və Slovakiyada fövqəladə və səlahiyyətli səfiri təyin edilmişdir.

Elgün NİFTƏLİYEV AzərTAc-ın xüsusi müxbiri
Vyana