Azərbaycanın Los-Anceles şəhərindəki Baş konsulluğundan daxil olan məlumata görə, mayın 28-i Nyu-Meksiko ştatının Santa-Fe şəhərində "Azərbaycan Respublikasının İstiqlaliyyət Günü" elan ediləcəkdir. Bu haqda Santa-Fe şəhərinin meri Deyvid Kossun imzaladığı rəsmi qərarda bildirilir. Qərarda Azərbaycan cəmiyyətinə xas tolerantlıq və plüralizm ənənələri xüsusi diqqətə çəkilmişdir.
Nyu-Meksika ştatından daha bir təbrik Amerikanın tanınmış ictimai xadimi, qubernator Bill Riçardsonun adından daxil olmuşdur. Cənab Riçardson qeyd etmişdir ki, tarix boyu azərbaycanlılar incəsənət, ədəbiyyat, texnologiya və elm kimi sahələrə çoxsaylı töhfələr vermişlər. Müsəlman Şərqinin ilk demokratik respublikasının ildönümündə azərbaycanlılar öz xalqının bu irsindən, Azərbaycan mədəniyyətinin zənginliyindən qürur duymalıdırlar.
Xatırladaq ki, bu ayın əvvəli Nyu-Meksiko ştatının Santa-Fe şəhərində mayın 10-u "Heydər Əliyev günü" elan edilmişdi.

Şəfəq AKİFQIZI AzərTAc-ın xüsusi müxbiri
Vaşinqton