Azərbaycan sinoptikləri ölkə ərazisində havanın kəskin soyuqlaşacağı barədə xəbərdarlıq yaymışlar.
Ekologiya və Təbii Sərvətlər Nazirliyindən çərşənbə günü Trend-ə verilən məlumata görə, yanvarın 25-i axşamdan 29-u gündüzədək Bakıda və Abşeron yarımadasında hava şəraitinin güclü küləkli və soyuq keçəcəyi gözlənilir.
Bu müddətdə havanın arabir yağıntılı olacağı, qar yağacağı gözlənilir.
Yanvarın 27-si və 28-də bəzi ərazilərdə qarın intensivləşəcəyi ehtimalı var.
Yanvarın 26-sı və 27-də havanın temperaturunun gecə 1-3 dərəcə şaxta, gündüz 0 dərəcəyə yaxın olacağı gözlənilir.
Yanvarın 28-də havanın temperaturu bir qədər də aşağı enəcək.
Saniyədə 10-15 metr sürətlə şimal-qərb küləyi əsəcək, arabir küləyin sürəti saniyədə 20-25 metrədək güclənəcək.
Gözlənilən şaxtalı hava şəraiti ilə əlaqədar yanvarın 27-si və 28-də yarımadanın bəzi yerlərində yollar buz bağlayacaq.
Qeyri-sabit hava şəraiti Azərbaycanın bölgələrində də müşahidə ediləcək.
Yanvarın 26-da Aran rayonlarında gündüz 1 dərəcə şaxtadan 4 dərəcəyədək isti, dağlıq rayonlarda 1-6 dərəcə şaxta olacaq.
Yanvarın 27-si və 28-də Aran rayonlarında gündüz 3 dərəcə şaxtadan 2 dərəcəyədək isti, dağlıq ərazilərdə 3-8 dərəcə şaxta proqnozlaşdırılır.