Ermənilərin Dağlıq Qarabağ üzrə Alt Komitənin fəaliyyətinin uğursuzluğa düçar olması ilə bağlı bəyanatları həqiqəti əks etdirmir. Bu komitənin fəaliyyəti uğursuz deyildir.
Bu sözləri AŞPA-nın qış sessiyası çərçivəsində qurumun səlahiyyət müddəti başa çatan sədri Mövlud Çavuşoğlu mətbuat konfransında demişdir.
Mövlud Çavuşoğlu Ermənistan tərəfinin Dağlıq Qarabağ üzrə Alt Komitənin fəaliyyəti ilə bağlı bütün həqiqətləri demədiyini bildirmişdir. "Alt Komitənin fəaliyyətinin yenidən bərpa edilməsinə dair qərar türk siyasətçisinin qəbul etdiyi qərar deyildir. Bu, AŞPA Bürosunun təşəbbüsüdür. Büro onun prezidenti və üzvlərini təyin etmişdir. Təəssüf ki, mandatımın sonunda Ermənistanın rəsmiləri, o cümlədən prezidentinin mənə qarşı münasibəti ədalətli və düzgün deyildir. Sözügedən komitənin bundan sonrakı fəaliyyəti ilə bağlı Büro qərar verəcəkdir", - deyə M.Çavuşoğlu bildirmişdir.

AzərTAc