Yanvarın 18-də Azərbaycanın xarici işlər naziri Elmar Məmmədyarov ölkəmizdə səfərdə olan ABŞ dövlət katibinin köməkçisinin Avropa və Avrasiya məsələləri üzrə müavini Erik Rubin ilə görüşmüşdür.
Xarici İşlər Nazirliyinin mətbuat xidmətindən bildirmişlər ki, E.Məmmədyarov Azərbaycan ilə ABŞ arasında münasibətlərin müsbət templə inkişaf etdiyini diqqətə çatdıraraq, müxtəlif sahələrdə əməkdaşlığın daha da genişləndirilməsinin vacibliyini qeyd etmişdir.
E.Rubin beynəlxalq sülhün təmin olunmasında Azərbaycanın verdiyi töhfəni yüksək qiymətləndirmişdir.
Görüşdə ölkələrimiz arasında enerji sahəsində əməkdaşlıq məsələləri, Yaxın Şərq və Cənubi Qafqazdakı vəziyyət, Ermənistan- Azərbaycan, Dağlıq Qarabağ münaqişəsinin sülh yolu ilə həll olunması istiqamətində aparılan danışıqlar və bir sıra qarşılıqlı maraq doğuran mövzular ətrafında fikir mübadiləsi aparılmışdır.