Rusiyada fəaliyyət göstərən erməni diaspor təşkilatları Fransa parlamentində qəbul edilən qondarma "erməni soyqırımı" iddiasını inkar edənlərin cinayət məsuliyyəti daşıması haqqında qanunun eynisinin Rusiya Dövlət Dumasında qəbul edilməsi üçün fəaliyyətə başlamışlar.
APA-nın Moskva müxbirinin verdiyi məlumata görə, ermənilərin kompakt şəkildə yaşadığı Soçi şəhərində imzatoplama kampaniyasına başlanılıb. Kampaniyanın təşkilatçısı Soçi şəhərində fəaliyyət göstərən "Soçi Ermənilər Birliyi" diaspor təşkilatıdır. Təşkilatın sədri Valeri Torosyan yaxın günlərdə toplanan imzaların Rusiya Dövlət Dumasının spikeri Sergey Narışkinə, hakim Vahid Rusiya Partiyasına və müxalifətdən olan millət vəkillərinə göndəriləcəyini bildirib.
Qeyd edək ki, Fransa Milli Assambleyası ötən ilin sonlarında analoji qanun layihəsi qəbul edib. Layihə təsdiqlənmək üçün Fransa Senatına göndərilib və Senatda müzakirəyə çıxarılacaq.