Yanvarın 11-də fövqəladə hallar naziri, general-polkovnik Kəmaləddin Heydərov Pakistan İslam Respublikasının ölkəmizdəki səfiri İnayatullah Kakar ilə görüşmüşdür. 
FHN-in mətbuat xidmətindən AzərTAc-a bildirmişlər ki, görüşdə Kəmaləddin Heydərov nazirliyin fəaliyyəti, həmçinin fövqəladə halların idarə edilməsi sahəsində qurumun beynəlxalq əlaqələri barədə qonağa ətraflı məlumat vermişdir. Nazir Pakistanın müvafiq qurumları ilə qarşılıqlı təcrübə mübadiləsinin aparılmasının əhəmiyyətini xüsusi qeyd etmişdir.
Səfir İnayatullah Kakar səmimi qəbula görə təşəkkürünü bildirmiş və ötən il Pakistanda baş vermiş daşqınlar zamanı Fövqəladə Hallar Nazirliyi tərəfindən göstərilmiş humanitar yardımı yüksək qiymətləndirmişdir. Səfir, həmçinin hər iki ölkənin müvafiq dövlət qurumları arasında əməkdaşlığın dərinləşməsinin vacibliyini vurğulamışdır.
Görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.

AzərTAc