Türkiyədə prokurorluq ana müxalifət lideri - Cümhuriyyət Xalq Partiyasının (CHP) sədri Kamal Kılıçdaroğlu haqqında təhqiqata başlayıb.
APA-nın "TRT Haber" kanalına istinadən verdiyi məlumata görə, İstanbulun Silivri rayon prokurorluğu "ədalət mühakiməsini təsir altına almaq" və "məhkəmə üzvlərinə həqarət" ittihamı ilə K. Kılıçdaroğlu haqqında təhqiqata başlamaq haqqında qərar qəbul etmişdir. K. Kılıçdaroğlunun toxunulmazlığının ləğvi üçün Ədliyyə Nazirliyinə müraciət olunmuşdur. Nazirlik öz növbəsində bu müraciəti parlamentə göndərəcək.
Qeyd edək ki, K. Kıllıçdaroğlu bir neçə gün əvvəl Silivri həbsxanasının qarşısında jurnalistlərə verdiyi açıqlamada siyasi ittihamlarla həbs olunanların saxlanıldığı bu həbsxananı konslagerə bənzətmişdir. O, "Ergenekon" işi üzrə məhkəmə prosesini idarə edən hakimləri "hakim" adlandırmağı özünə sığışdırmadığını söyləmişdir.
Toxunulmazlığı ləğv olunarsa müxalifət lideri haqqında ittihamnamə hazırlana və o, mühakimə oluna bilər.