Azərbaycanın Dövlət Şəhərsalma və Arxitektura Komitəsi Bakı şəhərinin mərkəzi hissəsinin ətraflı planı layihəsini təsdiq edilmək üçün hazırlamışdır. Bu barədə cümə axşamı Trend-ə komitənin sədr müavini Dövlətxan Dövlətxanov məlumat vermişdir.
Onun sözlərinə görə, layihə təsdiq edilmək üçün bu ay Bakı Şəhər İcra Hakimiyyətinə təqdim ediləcək: "Layihə üzərində iş artıq başa çatmış və bir sıra təşkilatlarla razılaşdırılmışdır. Bakı Şəhər İcra Hakimiyyətinə təqdim etmək məqsədilə sənədlər paketi hazırlanmışdır. Digər strukturlarla razılaşdırılma zamanı bir sıra mülahizələr səsləndirilib ki, onlar da son variantda nəzərə alınmışdır".
Paytaxtın ətraflı planı 2030-cu ilə qədər dövrü əhatə edir.
D.Dövlətxanovun sözlərinə görə, mövcud plan üfüqi xətt üzrə "Amay" ticarət mərkəzindən Dövlət Bayrağı Meydanına qədər, şaquli xətt üzrə isə Dənizkənarı Parkdan Bakıxanov küçəsinə qədər olan təxminən 1500 hektar ərazini əhatə edir.