Separatçı rejimin Dağlıq Qarabağda keçirdiyi "seçkilər"lə bağlı Azərbaycan hökuməti artıq öz mövqeyini bildirmişdir. Azərbaycan hökuməti bütün beynəlxalq təşkilatları, xüsusilə bölgədə sülhməramlı missiya ilə məşğul olan ATƏT-in Minsk qrupunu bu seçkiləri pisləməyə və rejimə öz etirazını bildirməyə çağırmışdır. Bu çağırışlar eşidilmişdir.
Bu sözləri mayın 24-də Azərbaycan Prezidenti Administrasiyasının ictimai-siyasi məsələlər şöbəsinin müdiri Əli Həsənov demişdir.
Şöbə müdiri bildirmişdir ki, əhalisinin yarısının məcburi köçkün vəziyyətində olan bölgədə istənilən halda seçki keçirmək mümkün deyildir. Biz dəfələrlə demişik ki, bu "seçki" separatçı rejimin ömrünün uzadılmasına, onun qeyri-qanuni fəaliyyətinə qanuni don geyindirməyə xidmət göstərir. Azərbaycan bu faktla barışa bilməz. Azərbaycan dəfələrlə bəyan etmişdir ki, nə qədər Dağlıq Qarabağın hüquqi statusu razılaşdırılmayıb, məcburi köçkünlər öz evlərinə qayıtmayıb, orada keçirilən "seçkilər" qanuni ola bilməz.{nl}